Het jy geweet ‘n rugoperasie kan nou deur twee klein sleutelgat-snytjies in die rug gedoen word? En dat die pasiënt slegs ure ná die operasie ontslaan word, self huis toe kan ry en kan sit, staan en lê soos voorheen? En dat die pasiënt selfs ná slegs 8 dae weer kan begin oefen?
Die nuwe tegniek genaamd bi-portale laminektomie, of – disketomie of – fusie word in twee sentra in Suid-Afrika gedoen, naamlik by die Spine Center in die Paarl en Kuilsrivier en in Richardsbaai.
Marí Hudson het met dr Shawn Venter, ortopeed verbonde aan die Spine Center in die Paarl gesels. Hy het sedert Junie 2022 meer as 100 van hierdie prosedures gedoen.
Luister hier na die volledige program op Gesondheid op RSG:
Die tegniek behels bi-portale endoskopie omdat twee klein snytjies in die rug gemaak word. ‘n Klein kamera word deur een gaatjie gestoot en die instrument deur die tweede gaatjie. Omdat die kamera-snytjie sowat 3 cm bokant die instrument snytjie is, kan die chirurg letterlik om hoeke kyk en baie goed sien waar om te sny en hoe om te sny.
Omdat die spier nie van die been afgestroop moet word soos in oop chirurgie nie, maar intakt bly, hoef dit nie weer te heg nie, en kan dit onmiddellik weer geaktiveer word nie. Ná oop chirurgie neem dit sowat 8 weke vir die spier om weer te heg (twee weke) en goed geaktiveer (nog ses weke) te word.
Die pasiënt is gouer op die been, het minder pynstillers nodig en daar is minder bloeding by die wond. Daar is ook ‘n kleiner risiko vir bloedklonte in die been en longkomplikasies weens lang tyd op rug.
Wat beteken die terme?
Nuwe tegnieke wat die afgelope 20 jaar vir rug-prosedures ontwikkel is, is mikrochirurgie, wat gelei het tot een-portaal endoskopiese prosedures en nou twee-portaal endoskopie, waarmee laminektomies, disketomies en selfs fusies gedoen kan word.
‘n Laminektomie beteken ‘n gaatjie word deur die lamina van die werwel gemaak, of die hele lamina (die rugkant van die werwel) word verwyder. Met die bi-portale laminektomie word ‘n kleiner deel van die lamina verwyder.
‘n Disketomie beteken die uitgestulpte deel van die tussenwerwelskyfie wat teen die spinaalkoord druk, word verwyder.
‘n Fusie beteken twee werwels word aan mekaar geheg. Dit word gedoen as die oorblywende tussenwerwelskyfie te dun is of deurgewerk is.
Lees meer oor die bi-portale diskektomie:
